رئيس التحرير: إسلام عفيفى
مجتمع النجوم

امير كرارة مراتي طلبتني للجواز !

اسرار سليم الانصاري بعيداً عن الكاميرا


  نشوي بركات
9/13/2017 2:50:18 PM

• أمير بتصحي الساعة كام؟
• لو معنديش شغل ما بين 10 لـ 11 الصبح.
• أول ما بتصحي بتعمل إيه؟
• بفطر فول، لازم أعمله بنفسي، لأن ابني بيحبه وبيميزه من وسط ألف طبق بيعرف أن ده الفول بتاع بابا.
• إيه مميزات الفول ده؟
• لا حكاية.. بعمله بزيت زيتون وكمون وفلفل وشرايح بصل وعيش بلدي محمص علي البوتجاز.
• يعني مش فنان بقي وبتفطر توست وجبنة ومربي؟
• لا.. مليش أنا في الجو ده، فطار يعني فول زي أغلب البيوت المصرية.
»طقوس»‬
• بتلبس إيه دايما في البيت؟
• شورت في الصيف وبنطلون تريننج في الشتاء.
• طولك كام؟
• 189.
• وزنك؟
• 90
• مقاس جزمتك؟
• 45.
»‬أول مبلغ»
• طيب أول مبلغ كبير مسكته في بداياتك كام؟
•120 ألف من برنامج »‬ستار ميكر»، ومكنتش مصدق نفسي.
• عملت بيه إيه؟
• كتير.. جبت عربية بالقسط »‬هوندا سيفك»، وبعدين معرفتش أدفع الاقساط روحت بايعها.
• أنت حريص ولا مسرف وبتشيل فلوس لبكرة؟
• لا مسرف جدا.. ومش بعرف أحوش، بيبقي نفسي أشيل حاجه لبكره لكن الإنسان بيعيش مرة واحدة بحب أجيب لولادي كل حاجة عايزينها.
• انت مجنون بإيه ودايما تشتريه؟
• الجزم.. مجنون بها، فعلا يعني كل ما أشوف جزمة »‬حلوة» لازم أشتريها.. ولبس طبعا.. ومؤخرا الكاميرات والموبايلات بحب أقتنيها جدا.
• إيه برفان المفضل؟
• أنا بحب العطور العربية جدًا، ودي أكتر برفان بستخدمه »‬مسك الإمارات».
• امتي عملت »‬كريدت كارد»؟
• من 15 سنة كانت بألف جنية وبعدين قفلتها.
• إيه أكتر أكله بتحبها؟
• قلقاس ورز بالشعرية ولحمة كباب حلة.
• بتفتح التلاجة كم مرة بالليل؟
• مرة واحدة، قبل ما أنام بس زمان كان ممكن أصحي الفجر كده  أكل أي حاجه يا سلام لو في محشي ساقع، أكل كام صباع وارجع أكمل نوم.
• إيه إللي اتغير فيك بعد الشهرة؟
• ولا حاجة، أنا زي ما أنا اسألي كل اللي يعرفني هيقولك كده.
• بتنام الساعة كام بالليل ؟
• مش بحب السهر أخري الساعة واحدة بكون نمت .
• انت رياضي ولا بتلعب مضطر علشان تحافظ علي جسمك؟
• رياضي جدا طول عمري بمارس الرياضة بكل أنواعها .
»‬أنتخة»
• انت نشيط ولا بتحب الأنتخة؟
• والله مؤخرا بقيت مش بحب الخروج.
• مكانك المفضل اللي دايما تقعد فيه في البيت؟
• أوضة ولادي.
• في واحدة طلبتك للزواج قبل كده؟
• آه.. قالتلي أنا هتجوزك، وبالفعل اتجوزتها »‬مراتي».
• بتحس الفن ملوش أمان علشان كده بتحرص يكون عندك بزنس بجانب الفن؟
• لا مش دي الفكرة.. بس أنا مش بحب أعمل أكتر من عمل في السنة، فبيكون شغلي من شهرين لأربعة في السنة وأنا مش بحب القعدة في البيت لازم أشتغل.
• بتشرب كام سجارة في اليوم؟
• 3000 مثلاً.. وأول مرة شربت سجاير في أولي ثانوي.
• إيه أسوأ عيوبك؟
• يعني مزاجي »‬مودي» بيتغير بسرعة .
• أنت برجك إيه؟
• الميزان.
• انت شخص متوتر داخل لوكيشن وبتربك اللي حواليك؟
• لا خالص بالعكس بكون مركز وهادي جدا.
• أنت درست تمثيل أو أخدت كورسات؟
• اطلاقا التمثيل مبيتعلمش دي موهبة وحاجة كده من عند ربنا أنا بمثل بموهبتي فقط.
• إنت شبه والدك ولا والدتك؟
• أنا شبه أمي طبق الأصل الله يرحمها.
• كنت قريب من مين أكتر؟
• أمي طبعا.. وبعد وما اتوفت بقيت قريب لوالدي لغاية آخر لحظة في حياته الله يرحمهما.
• أنت كنت طفل هادي ولا مشاغب؟
• لا شقي طبعًا.
• كنت بتهرب من المدرسة؟
• هاها.. أهرب من المدرسة؟، انا عمري ما روحت المدرسة أصلا  علشان أهرب آخر مرة روحت تقريبا في أولي إعدادي وبعد كده روحت علي الجامعة، وكنت بروح علي الامتحانات.
• عندك إيه أولاد؟
• ليلي وسليم .
• سليم واخد إيه منك؟
• جدع وطيب وحنين وفنان جدا، بيحب الكاميرات والتصوير أعتقد أما يكبر ممكن يكون مدير تصوير.
• وليلي؟
• ليلي مجنونة شقية جدا جدا وطيبة ودمها خفيف وهي اللي بتعمل روح للبيت.
• مراتك؟
• دي أهم حاجه في حياتي وهي اللي بتدعمني في شغلي وأحلي حاجة في حياتي.
• بتغير عليك؟
• دلوقتي لا خلاص، في ثقة وعارفة إنها هي وولادي اهم حاجه في حياتي .
• لو أولادك حبوا يمثلوا هتوافق ولا هتمنعهم؟
• لا طبعا اللي هما عايزين يعملوه ويختاروه هما أحرار بس نفسي »‬سليم» يكون مدير تصوير.
• بيتر ميمي؟
• أطيب مخرج في مصر وبينا انسجام وتفاهم ومخرج شاطر جدا.
• السقا؟
• ده حتة من قلبي أخويا وصاحبي ده الجنرال .
• محمود عبد المغني؟
• ده بقي الحب كله.. أخويا الجدع وصاحبي وبستمتع بالشغل معاه .
• لو هتنتج تحب تعمل فيلم مع مين؟
• أنا والسقا ومغني وعمرو يوسف وكريم عبد العزيز ومحمد هنيدي ومني زكي وهند صبري.
• ايه اللي يصعب تحقيق الحلم ده الاجور العالية؟
• لا.. صعوبته إنك تلاقي سيناريو بحجم الأبطال دول فيه دور مناسب لكل حد فيهم وانا اتمني يحصل ده في يوم.
• مين افضل ممثلة حاليا؟
• نيللي كريم ومنة شلبي مبدعين بصراحه.
• ومين اجمل واحدة بتمثل؟
• نور ومني زكي.
• مين كانت فتاة احلامك زمان؟
• هدي سلطان وشادية وناهد شريف يعني بحس هي رمز الأنوثة .
• ايه الصفة اللي لسه باقية معاك من الطفولة؟
• عنيد.
• امتي حسيت إنك وسيم ؟
• عمري ما حسيت ده بجد.
• ايه اللزمة اللي عندك في الكلام؟
• دايما بقول افاهمنيب وأقسم بالله حتي ابني بيقلدني دايما .
• انت بتقسط حاجات؟
• ياااه أنا مدمن تقسيط، أي حاجة باخدها قسط، زي اي بيت مصري ممكن اشتري حاجات بالقسط بس بكون ملتزم في السداد علي فكرة الفنان ده مش نازل من الفضاء، ولا معاه كنز عادي شخص مصري زي كل الناس وحاسس بالغلاء وكل حاجة.
• انت منين؟
• باب الشعرية.
• موبايلك نوعه ايه؟
• أيفون 7.
• فاتورة موبايل بتيجي عاليه؟
• أه.. لأني مجمع مراتي وولادي معايا بس لو أنا لوحدي ممكن تعمل ألف جنيه أنا مش بحب كلام كتير في موبايل.
• بتخاف من الحسد؟
• مش بخاف بس مش بحبه.
• ايه اكتر حاجه بتخاف منها؟
• طريق السفر، والسفر عموما بكون متوتر وشايل هم الطريق وانا رايح وراجع.
• انت رومانسي؟
• لاااا.
• انت موسوس؟
• اه جدا واكتر حاجة  عندي وسواس منها المرض مش بحبه.
• ضربت مرة واحده بالقلم؟
• عمري.
• عندك تأنيب ضمير تجاه شخص او ظلمت حد؟
• اعوذ بالله عمري الحمد لله.
• انت شقيت لغاية ما وصلت ولا الدنيا كانت مفروشة بالورد؟
• اه ابويا كان ملياردير!!.. لا طبعا شقيت وتعبت واخدتها من الصفر اول مبلغ مسكته وحمدت ربنا عليه من الفن 15 جنيه كان في اعلان مجاميع وبعدها كومبارس في أفلام وتعبت واجتهدت لغاية ما عملت اسم وده بقوله لكل الشباب سواء في الفن او في اي مجال لازم تتعب وتجتهد ومتيأسش أبدا مفيش حاجة بتيجي من غير تعب واللي بيجي من غير تعب بيروح بسرعة.
• اول فنان مشهور تشوفه في حياتك؟
• عامر منيب، الله يرحمه، ومكنتش مصدق نفسي إنسان خلوق ومحترم ومهذب ومتواضع لأبعد حد.

عدد المشاهدات 910

الكلمات المتعلقة :